“Әз-Наурыз-2022”
Ұлыстың ұлы күні -Наурыз мейрамы биыл қаламыздың оң жағалауындағы Мұхтар Әуезов алаңында М.О.Әуезов атындағы педагогикалық колледжінің ұжымы,ата-аналары мен студенттерінің қатысуымен жоғары деңгейде өтті. Арнайы тігілген «Әуезов-125 жыл», «Киелі киіз үй», «Тарихқа тағзым» киіз үйлерінің ішіндегі мазмұнды, құнды ақпараттардың ұсынылуы, көркемделуі алаңға ерекше сән салтанат беріп, көпшілік рухани азық алды. Салтанатты іс-шарада «Көш-керуен» төрт түлік мал иелері: Қамбар ата, Шопан ата, Ойсыл қара, Зеңгі баба, Шекшек ата, халқымыз қастер тұтқан Қыдыр ата мен Ұмай ана, қазақ ертегілерінің кейіпкерлері Желаяқ, Көлтауысар, Саққұлақ, Қаңбақ шал, Ер Төстіктер наурыз мерекесінің сәнін келтірді. Қыдыр ата жиналған қауымға “Наурыз бата” беріп, Ұмай ана ақ тілегін білдірді. Әжелер жаңа күнге тәу етіп, алаңда аластау рәсімін көрсетіп,шашу шашты.М.О.Әуезовтың шығармаларындағы әйелдер галереясынан студенттер үзінді оқып,қойылым ұсынды.Бес тас, тоғызқұмалақ, асық ойыны сияқты ұлттық ойындар ойнатылып,жеңімпаздар сыйлықтармен марапатталды.
