Шығыс Қазақстан облысының білім басқармасы облыстың кәсіпорындарымен бірлесе отырып, Өскемен мен Семей қалаларындағы колледждердің базасындағы Құзыреттілік орталықтары мен облыстың жетекші колледждерінде ағымдағы жылдың 4-8 қазан аралығында ақпараттық-коммуникациялық технологиялар, өндірістік және инженерлік технологиялар, білім беру саласы, қызмет көрсету саласы, көлік және логистика, білім беру, медицина саласы, шығармашылық және дизайн, құрылыс индустриясы бағыттары тағы басқа 47 құзыреттілік бойынша WORLDSKILLS SHYGYS – 2021 аймақтық кәсіби шеберлік чемпионатын ұйымдастырып өткізді. Чемпионатқа М.О.Әуезов атындағы педагогикалық колледжінен екі құзыреттілік бойынша студенттер қатысып, үш күн бойы өз болашақ мамандығының үздігі атану үшін күресіп, жүлделі 1 және 2 орындармен марапатталды. Атап айтсақ, «Бастауыш сыныптарды оқыту» құзіреттілігі бойынша Жақсыбаева Аружан АЛТЫН МЕДАЛЬ иегері, «Мектепке дейінгі тәрбие және оқыту» құзіреттілігі бойынша Бейсенова Еркеназ КҮМІС МЕДАЛЬ иегері.
WORLDSKILLS – еліміздің жас мамандарын ынталандырып, мемлекеттік деңгейде бақ сынауына мүмкіндік туғызатын халықаралық қозғалыс. Осы чемпионатта өз алғырлығы, кәсіби шеберлігі, жоғары білім, білік дағдыларымен даралана білген білімгерлерімізді аймақтық кезең жеңімпазы атануымен шын көңілден құттықтаймыз!
Колледж директоры ф.ғ.к. Ж.Ш.Алдамжарқызы чемпионат жеңімпаздарымен болашақ мамандардың кәсіби деңгейін көтеру мақсатында белсенділігін танытып, бірлесе жұмыс атқарған оқытушылар мен чемпионат жетекшілеріне және ата-аналарына алғысын білдіріп, құттықтады.
