“2022 жыл-Балалар жылы” аясында Семей қаласындағы М.О.Әуезов атындағы педагогикалық колледжінде 19 наурыз күні ұлттың ауызбіршілігін нығайтып, ұмытыла бастаған қазақылық қасиеттерімізді жаңғырту өскелең ұрпаққа үлгі, өнеге беру мақсатында 5-13 жас аралығындағы балаларга арналған “Төрлет, әз-Наурыз” мерекелік шарасы ұйымдастырылды. Колледжің бастауыш кәсіподақ ұйымы ұйымдастырған мерекелік шараға ұжым мүшелерінің балалары қатысты.
Салтанатты «Көш-керуені» төрт түлік мал иелері: Қамбар ата, Шопан ата, Ойсыл қара, Зеңгі баба, Шекшек ата, халқымыз қастер тұтқан Қыдыр ата мен Ұмай ана, қазақ ертегілерінің кейіпкерлері Желаяқ, Көлтауысар, Саққұлақ, Қаңбақ шал, Ер Төстіктер наурыз мерекесінің сәнін келтірді. Қыдыр ата балаларға “Наурыз бата” беріп, Ұмай ана бүлдіршіндерге “Наурыз сый” таратты. Әжелер жаңа күнге тәу етіп, аластау рәсімін көрсетсе, келіншектер көкке ақ құйып, шашу шашылды. “Ертегілер ауылында” ертегіші әжелер ертегі айтып берсе, “Ұлттық ойындар” ауылында бес тас, тоғызқұмалақ, асық ойындары ойнатылды. Балаларға арналған мереке жоғары дәрежеде өтіп, игі бастама балаларға қуаныш сыйлады.
