М.О.Әуезов атындағы педагогикалық колледжінде студенттерді сахна өнеріне, шығармашылыққа баулу мақсатында «Ес-Аймақ» жастар театры ұйымдастырылған. Театрдың жетекшілігіне биыл Ислам Фарухұлы Азизовтың келуімен театр жұмысы жандана түсті десек болады.
2022-2023 оқу жылында Жастар театры Абай облысы «Семей қаласының ішкі саясат бөлімі» ММ «Семей қаласының жастар ресурстық орталығы» КММ ұйымдастыруымен өткен «Студент жастар театры – 2022» фестивалінің жеңімпазы, «Үздік қойылым» аталымының иегері, «Үздік жастар театры – 2023» және «Саналы ұрпақ – жарқын болашақ» облыстық слет-форумының қойылымдар байқауларына қатысып, жүлделі орындар иеленді.
16 мамыр күні «Ес-Аймақ» жастар театрын қала тұрғындары арасында кеңінен насихаттау және ауыр дертке шалдыққан 5 айлық Ханшайым Дарханқызының еміне арнап ашылған қайырымдылық қорына үлес қосу мақсатында қайырымдылық қойылымы өтті.«Ес-Аймақ» жастар театрының «Алғашқы махаббат» комедиялық қойылымы көрермендерді мектеп партасына қайта апарып, қызығы мен шыжығы көп мектеп өміріне саяхат жасатып қайтты. Алғашқы махаббаттың нәзіктігі мен шынайылығын Қанат рөлін сомдаған ДТ 21-09-01 тобының студенті Сүйіндік Серікқали шеберікпен сомдаса, достың адалдығы мен қолдауын 35-топ студенді Ислам Асланбекұлы көрсете білді. Көрікті де ақылды жас мұғалім 36 топ студенті Еркежан Жұмадилова, қатал да талапшыл мектеп директоры МДТ 21-09-01 тобының студенті Демеубаева Жансая, 37-топ студентері: ауыл жігіті Айбол Абеу мен десантшы Ақнар Ахметқалиев сомдаған образдар көрермендер көңілінен шықты.
Қойылым соңында «Ес-Аймақ» жастар театрының мүшесі Ұлжан Шырақбайқызы көрермендерге алғыс білдіре отырып, қойылымнан түскен қаржыны Ханшайым Дарханқызының анасының қолына тапсырды. Колледж директоры, ф.ғ.к. Жанаева Шағангүл Алдамжарқызы «Ес-Аймақ» театрының тарихы туралы айта келе, қойылымның әрбір қатысушысына, қойылым режиссері И.Ф.Азизовқа алғыс білдірді. Кішкене бүлдіршін Ханшайымның анасына колледж болып қолдау көрсететіндігін жеткізді.
