Қайырымдылық – асыл қасиет. Халқымыз көмекке мұқтаж адамға көмек көрсетіп, қайырымдылық жасауды, кіріптарға қайыр беріп, қарттарды аялауды, мүгедектерді қолдап-қорғауды әрбір қайырымды адамның адамгершілік борышы деп есептейді.
М.О.Әуезов атындағы педагогикалық колледжінің студенттері 25 қазан – Республика күні қарсаңында «Қызыл крест» қоғамдық ұйымында қайырымдылық концертін өткізді. Мың бұрала билеген арулар қарттардың көзіне жас үйірілтсе, домбырада сан құбылта күй орындаған жігіттер ағалардың батасын алды. Әншілердің әніне тамсанған «Қызыл крест» қоғамдық ұйымының емделушілері алғыстарын білдірді.
