3 ақпан күні М.О.Әуезов атындағы педагогикалық колледжінде «Қазақ тілі мен әдебиеті мұғалімі» мамандығы бойынша білім алып жатқан Есіркеп Дәуренге «Үздік Әуезовші» төсбелгісі табысталды.

Есіркеп Дәурен – оқу орнында «Мәңгілік ел жастары – индустрияға» «Серпін-2050» мемлекеттік бағдарламасы бойынша білім алып жатқан 4-курс студенті. Дәурен Қызылорда облысы Қазалы ауданынан 2018 жылы келіп, Алаштың білім ордасының, талай дарынды түлеткен киелі оқу орынының бірінші курс студенті атанғалы бері нәтижеге жету үшін мақсатты түрде білім-ғылым іздеп, өнер мен спортты да қатар сүйіп, еңбектеніп келе жатыр. 2020-2021 оқу жылы Дәурен үшін сәтті басталды. Қыркүйек айында биыл тұңғыш рет тағайындалып отырған Асылхан Табылдыұлы Бекбаев атындағы стипендия иегері атанса, артынша «ТОП-100 студент» байқауының облыстың кезеңінің жеңімпазы болды. Өзін шығармашылық және ғылыми-ізденушілік бағытта әрдайым дамытып отыратын, колледждің қоғамдық және мәдени өміріне белсене араласатын Дәуреннің республикалық, облыстық, қалалық деңгейдегі бірқатар жетістіктері бір төбе болса, жыл сайын дәстүрлі түрде өтетін колледжішілік «Әуезов сыны» байқауынан алған Бас жүлдесі – бір төбе. Аталған жетістіктері ескеріле отырып, арнайы комиссияның шешімімен Есіркеп Дәурен оқу орнының 2020-2021 жылғы Үздік Әуезовшісі атанды.
Республикалық «Жас Отан» жастар қанатының төрағасы болған, бүгінде Парламент мәжілісінің депутаты Елнұр Сабыржанұлы Бейсенбаев оқу жылының басында оқу орынымызға арнайы келіп, Алаштың білім ордасының тарихымен, тыныс-тірішілігімен, жастарға білім берудегі озық және бірегей үлгісімен танысуы барысында биылғы Үздік Әуезовшіге арналған стипендияның демеушісі болатынын айтып, бүгін Дәуренге сол атаулы шәкіртақыны оқу орынымыздың түлегі, Үздік Әуезовші, Өскемен қалалық Мәслихатының депутаты Айтмұқаш Алмас табыстады.